Kommunip pingaartitai sisamaasut - Ataatsimuussuseq, Ilinniarneq, Amerlassuseq aamma Tikiffikkuminartuuneq – annertuumik kalaallit kulturiannut kinaassusiannullu attuumassuteqarpoq. Kulturi, kulturimik ingerlatsivinnuinnaq samminani, aammali peqatigiiffilerinermut, sunngiffimmi sammisanut, sanalunnermut, qimussernermut, kalaallit oqaasiinut aamma kalaallit qangaaniilli ileqquinut, ataatsimoornermik nukittuumik toqqammaveqartunut, sammivoq. Tamaanna innuttaasut ataatsimoorussaqassusianut takussutissaavoq – soorlu aamma kujataannit avannamut immikkuullarisutsit aamma assigiinngissutitsit taamatulli pissusissamissuuginnartigisut.
Aamaattaaq tunngavisumik naleqartitat kommunimut nutsertunut pitsaanerusumik akulerutitsinissamut kissaateeqqarnermik ilaqarput. Matumani tikittunut nutaanut oqaatsitigut ilinniartitsinissamut periarfissanik nutaanik neqerooruteqarnikkut. Tamanna nutsertunut aamma najukkami inuutaasunut pitsaanerusumik naleqalersitsisussaavoq. Najukkami najugallit aamma nutsertut oqaatsitigut avissaarutaasa millisinneqarnissaanik kissaateqarnermik siullertut aallaaveqassaaq kiisalu aappassaattut ilinniarusussuseqarnermut soqutiginninnermik pilersitsinikkut taamaalilluni tamanna neqeroorutinik aamma periarfissanik pitsaanerusunik pilersitsissammat.
Avannaata Kommunia kulturi pingaartitarilluinnarparput, tamatumalu ilisarnaatai tassaapput kulturi uumaasoq nukittoorlu ammalu peqatigiiffeqarneq, ineriartortuartut. Ilisarnaat taanna pigiinnarneqassaaq annertusarneqarlunilu – immitsinnut pilluta, kisiannili aamma tassaammat inuunitsinni toqqammavitta pingaarutillit ilaat: Aalisarneq, piniarneq aamma takornariaqarneq. Ilutigisaannillu, kulturerput tassaatittarparput nunarsuarmioqatitsinnik qaaqqusinitsinni sakkussat pitsaanerpaat ilaat, taamaaliornitsigullu suleqatissanik oqaloqatissanillu nutaanik pilersitsisarluta.
Kulturi assigiinngitsorpassuarnik kiinaqarpoq sinaakkuserneqarnissaminillu pisariaqartitsilluni – silami illullu iluani. Innuttaasunut annermik pingaaruteqarput ulluinnarni peqatigiiffilerinermilu sinaakkuttat, taamaattumillu taakkua immikkut sammineqartariaqarput. Takornarianut tikeraanullu allanut tunngatillugu, pingaartinneqartussat allaapput – matumani kommunip pinngortitami, kulturikkullu misigisassartaasa immikkuullarissut nittarsaannerat ”poortukkiarineqarlutillu”.
Anguniakkat
- Kommunalbestyrelsi, illoqarfinni nunaqarfinnilu kulturi misigisassanillu periarfissat nukittorsarniarlugit, ataavartumik sulissaaq.
- Kulturikkut ingerlatsinerup pitsaanerpaanik tigussaasunillu sinaakkutserneqarnissaa qulakkeerneqassaaq, matumani peqatigiiffiit ineriartornissaannut ininik atugassaqartitsineq, katersugaasiviit, atuakkanik atorniartarfiit, katersortarfiit il.il.
- Kulturikkut ingerlatanut sinaakkusiat, illoqarfiit allanngortitserlugit ineriartortillugillu sulinermi qitiusumik pingaarutilittut, atorneqassapput.
- Immikkut pingaartinneqassaaq, pisortat inaataanni ataatsimiittarfiit isersimaartarfiillu, qassinik ukioqarneq apeqqutaatinnagu naapiffigineqarsinnaallutillu pulaarfigalugit qasuersaarfiusinnaasut, pitsaalluinnartuunissaasa qulakkeerneqarnissaat.
- Illu aallarnisaavik aamma iluaqutaasumik kulturikkut neqeroorutinut ingerlatanullu sinaakkutarineqarsinnaavoq.
- Illut atorneqanngitsut allanngortillugit, kulturikkut sunngiffimmilu siunertanut atorneqarsinnaanerinut periarfissat, nalilersorneqassapput.
- Illoqarfiit nunaqarfiillu akimorlugit ataatsimoorussat nukittorsarneqarlutillu inerisarneqassapput – ajornanngippat nunagisat akornanni suleqatigiiffiit nutaat aqqutigalugit.
- Misigisassat aningaasalersorneqarnerat kommunip pilersaarusiornerani pissusisamisoortutut ilaassaaq.
- Kommunimut nutsertunnut nutaanut oqaatsitigut ilinniagaqarnissamut periarfissat pitsaanerusut.
