Avannaata kommunia tassaavoq kommuni nunassiffikkuminartoq inuunerinnissamut sinaakkutsigissoq – taamaattorli suli pitsaanerulerusuppugut. Toqqammavik tassaavoq ineqarnermut najugaqariaatsimullu politikki uummaarissoq nukittoorlu, inuussutissarsiutinik ineriartortitsinermut, pilersuinermut, ilinniarnissamullu periarfissanut qanittumik attuumassutilik. Namminersorlutik Oqartussat kommunillu ullumikkut nuna tamakkerlugu inissianik annertunerpaamik piginnittuupput. Ukiut tusindtillit nikinneranniit nammineerluni illuliorneq pisortaniit pingaartinneqarsimavoq.
AAvannaata Kommunia katillugit sisamanik illoqarfeqarpoq kiisalu 23-inik nunaqarfeqarluni katillugit inissianut 3.800 missaannut agguaassimasunik innuttaqarluni. Illoqarfiit nunaqarfiillu tamarmik assigiinngistunik immukkuullarissuseqarput kinaassuseqarlutillu, tamanalu kommunip siunissami ineriartortinnissaani attallugu pitsaasumik atussavarput. Tamannalu aammattaaq, pinngitsoorneqarsinnaanngitsumik pingaarnersiuisoqartariaqarneranik, isumaqarpoq, assersuutigalugu illoqarfiit ineriartorfissaat nutaat toqqarneqassatillugit. Pingaarnersiuineq najugaqariaatsimit aallaaveqarpoq, inoqarfiit immikkut pitsaaqutaannik periarfissaannillu, kisiannili aamma unammilligassanik toqqammaveqartumik. Imaappoq assigiinngissuseq tassaassaaq kommunip annertuup nukittoqutaasa ilaat.
Taamaakkaluartorli pissutsit imaapput, inissaqarniarneq tassaavoq aningaasaqarnerup ineriartornissaanut nikerarfisaaqarnermullu kigaalaqutaasoq, tassami sumiiffinni amerlasuuni suliffissaaleqineq inissaaleqinerlu inuit nuttarnissaannut akornutaavoq. Tamanna naammassisaqarsinnaanermut aningaasaqarnermullu sunniuteqarpoq – angerlarsimaffinni kommunimilu. Taamaattumik, inissaaleqineq nungusarneqassappat, pisariaqarpoq tamat atorsinnaasaannik inissialiortoqarnissaa nammineerlunilu illuliorsinnaanerup kaammattutiginissaa. Aallaavik tassaavoq, illuliorusuttut tamarmik, sanaartorfissaqartinneqarnissaat.
Kommunimi inissiat pitsaassusaat neqeroorutillu, assigiinngiiaartorujussuupput, ataatsimullu isigalugu iluarsaassisoqarlunilu aserfallattaaliisoqarnissa annertuumik pisariaqartinneqarpoq – silataasigut iluinilu. Tamanna nutaamik samminnittoqarnissaanik pisariaqartitsivoq, eriagisariallit sanaartoriaatsillu pitsaasut annaaneqassanngippata. Taamaaqataanillu inoqutigiit amerlassussat assigiinngiiaaqaat – assigiinngissuseq, pisariaqartitanut nutaanut, ilaqutareeriaatsinullu atugaaleriartortunut, naleqqussorinanngitsoq. Tassa imaapppoq, siunissami pilersaarusioraangatta inissianillu sanaartortilluta allaanerusumik eqqarsartassaagut – sanalluagaanerusut, neqeroorutit assigiinngiiaarnerusut, nukissiutinik atuinikinnerusut il.il. Suliassaq taanna pingaartuuvoq, ataatsimoorluta naammassisinnaallugulu naammassisariaqagarput.
Anguniakkat
- Avannaata Kommuniani inissianut nutaanut aamma innuttanut nutaanut inissaqartuassaaq. Tamanna qulakkeerneqassaaq ilaatigut inissiaqarneq- aamma najugaqariaaseq pillugu tamanut isiginnittumik naalakkersuinikkut nutaamik isummersornikkut, kommunimut tamarmut iluaqutaasumik tamatigoortuussusermullu tapersersuisuusumik.
- Illoqarfiit nunaqarfiillu ataasiakkaarlutik pitsaaqutaasa ineriartornissamullu periarfissaasa nalunaarsorneqarnerat, inissiaqarfiit pioreersut nutaassallu ulluinnarni pilersaarusiorneranni ingerlatsinermilu, sakkutut pingaarutilittut atuutissaaq.
- Pitsaassuseq, allanngorarneq qinigassallu amerlanerusut siunissami inissianut neqeroorutaasunut ilisarnaataassapput, taamaatullu nukissiutinik atuineq, imminut akilersinnaassuseq, silaannaallu pissusaanut naleqqussarneq, nutaanik illuliornermi pingaartitanut ilaassapput.
- Immikkut pingaartinneqassaaq inissiat tamat atorsinnaasaasa amerlisarnissaat – ilaatigut utoqqarnut innarluutilinnullu naleqqussakkat aamma ilinniartunut inissiat.
- Inissialiornerup ineriartortinneqarnera avatangiisinut naapertuussarneqassaaq, matumani, nunaminertat ataatsimoorussat, illoqannginnersat alianaatsut, sullissiviit, ineqarfigisallu ingerlatsiviisa allat tikikkuminartuunissaat eqqarsaatigalugit.
- Illuliornermi sinaakkutissat ilaatigut nukittorsarneqassapput allaffissornikkut eqaatsumik, pitsaalluartumik assigiiaartumillu ingerlatsisoqarneratigut.
- Inissiat pioreersut ilusaat pitsaanerulersinneqassapput ingutserineq nutarterinerlu aqqutigalugit, aamma illut ilusaannut politikki nutaaq toqqammavigalugu. Illuliornermi ilusilersuinikkut titartaanikkuluu pitsaassutsip pingaarrnerutinneqarnissaa aamma qaffassarneqarnissaa siunertaralugu pilersaarusiortoqassaaq, ilutigitillugu kalaallit sanaartornikkut ileqqutoqaasa attanneqarnissaata makitaniartuunngitsup aamma ataqqineqarnerata attanneqarnissaat ilanngullugit.
