Ilinniartitaaneq peqqinnerlu

Atuarfiit, ilinniarnertuunngorniarfiit aamma ilinniarfiit ingerlaqqiffiusut

Avannaata kommuniani katillugit 28-inik meeqqanut atuarfeqarpoq. Illoqarfinni atuarfiit 1.- 10. klasse-nut atuartoqartarput, atuarfiilli mikinerit nunaqarfinniittut 1. - 7. klasse-nut atuartoqartarlutik. Meeqqat atuarfianni unammilligassat pingaarnerit ilagaat nunaqarfinni atuartukinnera kiisalu iluarsartuussinisamik pisariaqartitsissoqarnera.

 

Avannaani Ilinniarnertuussat Ilinniarfiat imaluunniit GUX Aasiaat, nunarsuarmi ilinniarnertuussanut ilinnniarfiit avannarlersaasa ilaat Kalaallit Nunaanni ilinnniarnertuussat ilinniarfiisa avannarlersaraat aamma Avannaata Kommunianiit tigooqqaaspoq. Atuarfik Aasianni inissisimasoq kujataani Kangaatsiamiit avannamut Qaanaap tungaanut 1150 kilometerisut isorartutigisumi atuuffeqarpoq, taamaalillunilu illoqarfimmi ilinniartunut inissiani 400-it missaat agguataarlutik atuartuullutik. Ilinniarnertussat ilinniarfianniit ukiumut ilinniartut avannaaninngaanneersut 90-it missaat soraarummeertarput.

Avannaata Kommuniani illoqarfinni sisamaasuni tamani najukkami Piareersarfeqarpoq ukioq ataaseq FA-soraarummeernissamut piareersarnertut/piukkunnarsarnertut neqeeroorutigineqartarlutik taamaaliorneq inuussutissarsiutini suliffeqarnermut imaluunniit ilinniakkamut ingerlariaqqiffiusumut tunngavittut atorneqartarlutik.

Kalaallit Nunaanni aalisarnermut- piniarnermut ilinniarfituaq Uummannami inissisimavoq. Tassani piniartutut aalisartutullu ukiuni marlunni ilinniartitaaneq neqeroorutigineqartarpoq. Tamatuma saniatigut SPS Ilulissani inissisimavoq tassani socialpædagogit, socialhjælperit kiisalu socialassistentit ilinniartitaasarput.

Kommuneplanip suliarineqarneratigut, assersuutigalugu, kommunip atuarfiisa ilinniartoqarfiisalu allilerneqarnissaannut initaasalu pitsangorsarneqarnissaannut, nunaminertanik qulakkeerinnittoqartassaaq. Avannaata Kommunia illoqarfiit arfineq pingasut qitiusumik ilinniartoqarfiunerat nangittumik nukittorsarneqassaaq, pilersaarusiorfiullu atuutilersussap ingerlanerani, atuarfinnut ilinniarfeqarfinnullu pioreersunut suliniutip annersaa, iluarsartuussinernut allilerinernullu anikinnerusunut tunngatinneqassaaq. Naatsorsuutigineqarpoq, kommuneplanimi nunaminertani pineqartunut attuumassuteqartuni, inissaq naammattoq pineqareersoq.

Peqqinneq

Nunap immikkoortuani peqqinnissaqarfimmi `Avannaa`-ta ataani Avannaata Kommunia inissisimavoq, taanna pilersinneqarpoq peqqinnissaq pillugu aaqqissuusseqqinnermut atatillugu januar 2011-mi. Nunap immikkoortuani tamani nappasimaveqarpoq nunap immikkoortuanut tamanut atuuttumik nunallu immikkoortuani peqqinnissamik sullissineq tamaat akisussaaffigalugu, matumani nappasimaviit aamma peqqissaaveeqqat kiisalu sygeplejestationit mikinerusut ilanngullugit. Kommunimi nunap immikkoortuata napparsimavia Ilulissaniippoq, illoqarfiilli allat pingasut sundhedscentereqarlutik, takuuk hovedstrukturkortet.

Nunap immikkoortuani Peeqqinnissaqarfimmiit aamma kigutigissasoqarneq isumagineqarpoq, illoqarfiit pigisakkaarlutik ataatsimik imaluunniit amerlanerusunik kigutit nakorsallit. Taamaattorli Qaanaaq ukiup ilaannaanut kigutit nakorsaanniit tikeraarneeqartarpoq.

Peqqinnissaqarfiup 2011-mi iluarsaqqinneratigut aammattaaq telemedicin, ilaatigut innuttaasunut avinngarusimasuni najugalinnut, neqeroorutitut nutaatut atuutilersinneqarpoq. Telemedicin-ip atorneqarsinnaanera pillugu assigiinngiiartunik misilittagaqartoqarpoq, 2013-mili telemedicinip atorneqarnissaanut siunersortimik atorfinitsitsisoqarneratigut, peqinnissaqarfimmiit neqeroorutip ingerlateqqinnissaa ineri-artortinneqarnisaalu aaliangiunneqarput, taamaalilluni eqqortumik sukkanerusumillu, nappatip suunera paasineqarsinnaalerluni, nakorsarneqarneralu aallartillugu.

Taamatut allaanerusumik peqqinnissamut tunngasumik suliniuteqarneq, ullumikkut aaqqissuussaaneq aallaavigalugu suliaavoq, sapinngisamik nuna tamakkerlugu sumiiffinni tamani peqqinnissaqarfik peqatigalugu, digitaliserinerlu aallartinneqareersoq nangeqqillugu. Pinaveersaartitsineq peqqissutsimillu siuarsaaneq immikkut pingaartillugit sammineqassapput – ilaatigut utoqqaat amerlanerulernerisigut, inooriaatsit kingunerinik nappaatit pilersartut amerliartornerisa, akisunerusunik immikkuullarissunillu suliarinneriaaseqalernerup, aammalu innuttaasunut annertunerusumik, pitsaanerusumillu, attaveqartoqalernissaanik piumasaqaataasut kingunerinik, aningaasartuutit annertunerulernissaat, pissutigalugu.