Siuaasaniit kingornussarsiat

Siuaasaniit kingornussarsiatta kinaassutsitsinnik suminngaanneernitsinnillu oqaluttuuppaatigut, taamaattumik siuaasaniit kingornussarsiat ullumikkut siunissamilu pingaaruteqarput. Inuit tassaapput issittup inoqqaavi, ukiuni tusindtilippassuarni pinngortitamut inuuffigisaminnut, nunarsuarmilu pingortitap oqimaaqatigiissusaani mianernarnerpaat ilaannut, naleqqussarsimasut. Inuit kulturiat issittumilu inuusaaseq innarleruminarluinnartuupput, mannakkorpiaq inuiaqatigiit ineriartornerat silallu pisusaata allanngoriartornera aallaavigigaanni, taamaattorli Inuit kulturiat, kalaallit atuakkiortaasianni, eqqumiitsulioriaasianni, nipilersortarneranni nereriaasiannilu suli uumavoq.

Avannaata Kommunia sumiiffippassuaqarpoq tamarmik immikkut siuaasaniit kingornussaqarfiusunik – tamanna tunngavoq, illunut eriagisarialinnut, kiisalu inoqarfinni asimilu kulturikkut naleqartitanut.
Siuaasaniit kingornussarsiat, inuit ingerlataasigut, pinngortitallu allanngoriartorneranit, ataavartumik sunnigaajuarput, taamaattumillu nakkutigineqartuartariaqarlutillu illersorneqartuartariaqarlutik. Pilersaarusiornikkukt siuaasaniit kingornussarsiagut pimoorullugu paarisinnaavagut, aammali peqatigisaanik misigisassanik naleqartitanillu nutaanik pilersitsilluta, inuiaqatigiinnut iluaqutaasumik aammalu ataatsimut kinaassutsitsinnik pilersitsiviusumik. Avannaata Kommuniata kulturikkut kingornussat annertuumik pingaartitarai, ataatsimoorullugu kulturikkut kingornussatta illersorneqarnissaata ataatsimoorussamik paasinninnissaq kissaatigalugu, taamaalilluni taakku nalillit annaaneqannginnissaat qulakkeerneqassammat.

Kommunalbestyelsip pingaartilluinnarpaa avannaani siuaasaniit kingornussarsiat illersorneqarnissaat – inoqarfinni sanaartorfiusimasuni, taamatullu asimi. Anguniagaq tassaavoq – siunissami suliniutit ilaattut – innuttaasut pilersaarusiukkamik suliami akuutinneqariartuaarnissaat. Innuttaasut pissusissamisoortumik qitiusumik atuuffeqarput illunut eriagisarialinnut tunngatillugu, aammali ilutigisaanik nalituumik ikiuussinnaallutik, siuaasaniit kingornussarsiat oqaluttuaatillu, nalunaarsorneqarneranni.

Anguniakkat

  • Kulturimut politikki uummaarissoq qulakkeerneqassaaq, siuaasaniit kingornussarsiatsinnik kingulissatsinnut ingerlatitseqqinnitsigut.
  • Siuaasaniit kingornussarsiaq takusassiarineqassaaq, illoqarfitsinnik nunaqarfitsinnillu paasinninnerup toqqammaviisa ilaattut, soorluttaaq siunissami ineriartornermut ilaatinneqassasoq. Taamaattumik siuaasaaniit kingornussarsiat nittarsaanneqarnerat nukittorsarneqassaaq – asimut inoqarfinnullu tunngatillugu. Tamanna ilaatigut pissaaq IT attaveqaatillu nutaaliaasut aqqutigalugit.
  • Tigussaasumik pilersaarusiorneq nunaminertanullu allattoqarfeqarneq ingerlanneqassapput siuaasaniit kingornussarsiat kulturimillu aallaavilimmik immikkut ilisarnaatsit, kommunip iluani sumiiffinni assigiinngitsuniittut, pingaartillugit.
  • Nalunaarsuinerit, misissueqqissaarnerit aamma ingerlatitseqqiinerit aqqutigalugit, ataatsimoorussamik eqqaassutissat pillugit annertunerusumik soqutiginnilersitsiniarluni, paasinninnerit aamma eqqarsarluarluni/asannittumillu, illuutit nutaannginnerusut aamma illoqarfimmi avatangiisit pillugit kommuni kissaateqarpoq.
  • Illoqarfiit nunaqarfiillu immikkuullarissusaat aamma kinaassusaasa ataaneqarnissaat kisimi kissaatigineqanngilaq kisiannili aamma siuarsarneqarlutillu takuneqarsinnaanerulernissaat – takornarissat ornittagaattut kisiannili aamma ingammik piffiit najukkami tulluusimaarutigineqarsinnaasut ilanngullugit.
  • Ilulissat Kangerluat 2004-mi UNESCO-mit nunarsuarmioqatigiit eriagisassaattut toqqaarneqarpoq immikkorluinnaq ittumik pinngortitaassuseqarnini pillugu. Taamaattumik Kommuninimi anguniagaavoq tamannaa ataatsimoorluta illersugarissagipput tamannalu pissasoq kulturikkut kingornussavut pillugit ilisimasanik ingerlatitseqqiinerit aqqutigalugit, tammmalumi aallartisarneqarpoq Kangia pillugu Ilisimasaqarfik nutaaq aqqutigalugu. Tamatuma saniatigut Kommunimit kissaatigineqarpoq teknologi nutaaliaasoq atorlugu kulturikkut kingornussavut pillugit ingerltitseqqiinerit aamma siunissami tamatuminnga attasinissami immikkut samminninnerup allartinneratigut.