Sammivilersuutit pingaarnerit

Ilitsersuut

Avannaata Kommunia, issittup killeqarfiata avannaani inissisimasoq 526.000 kvadratkilometerit missaannik angissuseqarpoq annersaa Kalaallit Nunaata kitaata avannaanilluni. Kommuni nunaarsuarmi kommunit annersaasa ilagaat sineriaqarlunilu kommunimi illoqarfiit nunaqarfiillu inissisimaffigsaanni 14.700 km-ngajannik isorartugisumi.

Naak kommunip annerpaartaa sermersuarmit qallerneqarsimagaluartoq, silaanna, uumasoqassusia, naasoqarneralu avannaamiit kujammut assigiinngisitaaqaaq, aammattaaq kaperlattarnerata, seqeernullu kaviinnartarnerata, sivisussasaat assigiinngeqaat. Issittumik silaannaqarnerata kinguneranik, ukiut amerlanersaanni Decembarimiit Apriili/Maaji-mut, imaq sikuusarpoq. Taamaattumik kommunip annersaani umiarsuit atorlugit angalaneq, piffissami tamatumani ajornarsisarpoq, taamaaligaangallu nassiussat ilaasullu timmisartuunneqartariaqalersarput. Pinngortitap piliaanik assigiinngissutsit saniatigut, avannaani Siorapalummiit kujammut Attumut, kulturikkut sumiorpaluutsikkullu assigiinngissutsit annertoqaat.

Sammivilersuut pingaarneq allaaveqarpoq pilersaarutinut suleriaatsimik ,aamma Kommunalbestyrelsip kommunip ineriartornissaa pillugu takorluugaanik, imarisaalu tassaapput Qaasuitsup Kommuniani ilisarnaatit pingaarnerit suleriaatsillu ataatsimut isigalugit allaaserineri, matumani illoqarfiit ilusaat, inuussutissarsiutit, angaallanermi periarfissat, ilinniartitaanermi ingerlanneqartut pingaarnerit, aamma imminut pilersorneq allallu. Sammivilersuut pingaarneq takussutissiissaaq, ullumikkut pissutsit qanoq innernerannut, aamma ineriartornerup siunissami isikkussaatut takorluukkanut.

Sammiviit piviusut pilersaarusiorfigineri, innuttaasut ineriartornerani sumut ingerlasoqaraluttualerneranik tikkuussissutinut, najugaqariaatsimut suliffissaqarnermullu qanimut attuumatillugit suliarineqartarput, taamalilluni imminut nammattumik, siunniussanullu naapertuuttumik ineriartortoqarnissaanut tunngavissat pisarsiarineqarsinnaasut pitsaanerpaat qulakkeerneqarlutik – ilaatigut silap pissussaasa allanngoriartorneri qissimigaarlugit.