Silap pissusaa, avataniiseq pinngortitarlu

Kalaallit-Nunaat issittorlu, silap pissusaata allanngoriartorneranit, nunarsuarmi sumiiffippaasuarnit allanit annertunerusumik sunnigaapput. Allanngornerit annikitsut malunnaatilimmik sunniupput: Kiannerulerpoq, sila unerisimannginnerulerpoq aamma nittaalaq sialullu annertunerulerput. Immap sikua aappoq, sermersuaq qumariartorpoq imarlu qaffalluni. Tamatuma kingunerisinnaava immap sarfaasa allanngornerat, nunaviup silaannaanut malunnaatilimmik sunniuteqartussaq. Ungasinnerusoq eqqarsaatigalugu, naasoqarneq uumasoqarnerlu qularnanngitsumik allannguuteqassapput, naasut nutaat naasinnaalissapput, allalli tammarlutik. Amerlassuseqarnerup attatiinnarneqarnissaanut periarfissat pitsaapput.

Pisariaqarluinnarpoq imminut nammattumik ingerlatsinerup annertusineqarnissaa, taamatullu avatangiisip artorsartinneqannginnissaata tamaviaarluni sulissutiginissaa, sumiiffinni nunarsuarlu tamakkerlugu. Suliffissuarnik, nukissiuutinik annertuumik pisariaqartitsisunik, ineriartortitsinissamut periarfissanikkiartorpoq, ataavartumik nukissiuuteqarneq, pingaartumik erngup nukinga, tunngavigalugit. Taamaattorli aammattaaq kommunalbestyrelsip kissaatigaa ataavartumik nukissiuuteqarnerup allanik toqqammavillip annertusarneqarnissaa sulissutigineqassasoq, assersuutigalugu anorip seqernullu nukingi eqqarsaatigalugit.

Ingerlatat kingunerannik avatangiisip sunnerneqaatigeratarsinnaasai, peqqissaartumik misissorneqartassapput, suliarineqartassallutillu kommunip avatangiisimut pilersaarusorneranut ilagitillugit. Tamanna aamma, ataatsimut isigalugu illoqarfiit inuussutissartiutillu ineriartortinneqanerannut tunngatillugu – minnerunngitsumik – asimi ingerlatarineqarsinnaasunut, tunngavoq. Asi tassaavoq kommunimi ingerlatsivik nutaaq. Ataatsimut maleruagassat nutaat, Avannaata Kommunia tamakkerlugu asip imminut atasumik pilersaarusiorfiginera, allaffissornikkullu ingerlanneqarnera, qulakkiissavaat. Tamaalilluta qulakkiissavarput, pinngortitap kusanartorsuup immikkuullarissup nunallu pissarititaasa innarlerneqannginnissaat, aammali pinngortitaq tikikkuminarsarlugu – innuttaasunut takornarianullu, taamatullu aamma aallaaniarnermi piniariarnermilu.

Anguniakkat

  • Silap pissusaata allanngornera sillimmartaarfigineqassaaq imminut nammassinnaassuseq, silap pissussaanut naleqqussarneq ungasissumullu ataatsimoortumik aaqqiissutissat eqqarsaatiniitillugit. Suliniutinik imminut nammassinnaasunik inuussutissarsiutinillu pingaarnersiuineq CO2 –mik anniatitsinermik annikillisitseqataassaq.
  • Asip pilersaarusiorfigineratigut pinngortitap artorsartittaanera annikillisarneqassaaq, peqatigitillugulu innuttaasut asiarnissamut periarfissaat tikikkuminassuserlu pingaartinneqassapput.
  • Illoqarfiit nunaqarfiillu ineriartortinneqarnerat, imminut nammassinnaassuseq aamma avatangiisimut silallu pissusaanut tunngasut eqqarsaatigalugit, pissaaq.
  • Inuussutissarsiutit ineriartortinnerat, matumani takornariaqarneq, aallaaniarneq piniarnerlu, pissaaq silap pissusaa, avatangiiseq imminullu nammassinnaassuseq sianigalugit, taamaaliornikkut kommuni ”nittarsaallugu”.
  • Nutaanik sanaartornerit iluarsartuussinerillu, avatanggiisimut tunngatillugu imminut nammassinnaasut nukissiuutinillu atuinikitsut, pingaartinneqassapput. Kommuneplanip, misileraataasumik nutaamillu eqqarsarluni sanaartorneq, periaatsinik atortussianillu nutaanik issittumi pissutsinik, issittumilu sanaartoriaatsimik aallaaveqartumik atuiffiusoq, qulakkiissavaa.
  • Ataavartumik nukissiuuteqarnermut periarfissat annertusarneqassapput assersuutigalugu makkua, anori, seqernullu kissaa, annertunerusumik misissuiffigineqassapput.