Angallannermi periarfissat

Pitsaasumik ingerlalluartumillu angallannermi periarfissaqarneq, inueqatigiit ineriartornissaanni, tunngaviuvoq. Tamanna inuuttaasut nikissinnaassusianut aamma ulluinnaannut pingaaruteqarpoq, soorlu aamma suliffeqarfiup unammillersinnaaneranut aalaajangiisuusumik uuttuutitut atorneqartartoq, kiisalu kommunimi takornariaqarnikkut inuussutissarsiutip ineriartortinneqarnera ilanngullugu.

Angallannermi periarfissat Avannaata Kommunia immikkorluinnaq pingaaruteqarput, isorartussuseq, silallu pissusai ilungersunartut, pissutigalugit. Mittarfiit aamma umiarsualiviit nutaaliaasut pilersorneqarnermut kiisalu assartuinermut, aamma takornarisssanik aamerlasoorpassuarnik ukiut tamaasa uagutsinnut ikeraartartunut kiisalu takornariqarnerup nagittumik ineriatorteqqinnissaanut atatillugu aalajangiisuusumik pingaaruteqarput.

Angallannermi periarfissat ilagaattaaq aqqusernit nalinginnaasut aqqusineeqqallu, kiisalu amerlasuunik ataatsikkut angallassineq – tassalu ulluinnarni pitsaasumik tikinneqarsinnaanermik qulakkerinneq, taamaattumillu annertuumik pingaartinneqartoq.

Attaveqaatitigut ingerlaavartumik aningaasalersuinissap pisariaqartilluinnarneqarnera Kommunalbestyrelsimit annertuumik eqqumaffigineqarpoq kisiannili aamma naalakkersuisut nunatsinni attaveqaatitigut aningaasalersuineranut ataqatigiissaarinikkut pisariaqartitsinermit aamma ataatsimut isiginninnermit aallaaveqassalluni. Ineriartorneq taamaalilluni pingaarnertut inuussutissarsiutitigut ineriartortitsinermut qanimut suleqatigiinnikkut pissaaq kiisalu najugaqarfinni pilersaarusiorneq ilanngullugu. Piifissaq pilersaarusiorfiusoq qaangiuttumi attaveqaatitigut aningaasalersuinissamut ataqatigiissaarinissaq qulakkeerniarlugu illoqarfinni aamma nunaqarfinni tamani angallannermut aamma aqqusineqarnermut pilersaarutit suliarineqarsimapput. Suliassaqarfinnut pilersaarutit uunga kommunimut pilersaarummut ilanngussuunneqarput kiisalu nunaminertalerinermut ataqatigiissarneqarlutik. Ilulissani mittarfiup 2200 meterimut allilerneqarneranut nutaamik tunngaviusumik pilersaarusiortoqarpoq, tassanilu pilersaarusiorneq aallartisarneqareerluni.

Mittarfimmik allilerineq suliniutinut arlaqartunut ingerlareersunut tapersiisuuvoq, soorlu Kangia pillugu Ilisimaqarfimmut suliniut, Ilimanami suliniummut kiisalu Eqi-mik allilerineq ilanngullugu. Suliniutip Ilulissani eqqaanilu allatigut attaveqaatitigut ineriartortitsinissamut pisariaqartitsilersussaapput. Ilutigitillugulu tamanna siunissami Ilulissat illoqarfittut allilerneqarnissaanut annertuumik ineriartortitsinissamut periarfissiisussaalluni kiisalu mittarfimmut allilerneqartumut, matumani Nuuaarsuup tamakkiinerusumik ineriartortinnissaata pilersaarusiornissaa, Ilulissat aamma Mittarfiup akornat, kiisalu kangerluarsuup kujtaatungaaniittut aallartisarneqareersut ilanngullugit.

Umiarsuarsuit takornariartaatit ingerlattagaasa ineriartortinneqarnerannut atatillugu pilersarusiornermi tunngaviit nutarterneranni suliap ilaatut, Ilulissat Oqaatsullu akornanni sumiiffinni immikkut toqqakkani, imaatigut misissuinermik ingerlatsisoqarsimavoq paasissutissarsiniarlunilu uuttortaasoqarsimalluni. Pilersaarusiorfiup atuutilersussap ingerlanerani, Ilulissat umiarsualivissaata nutaap, tunngaviusumik pilersaarusiornera, kommuneplanimut ilanngunneqassaaq. Ilulissat ullumikkut umiarsualiviannut atatillugu sumiiffit sisamat eqqartorneqartut tassaapput, Itisuarsuk, Paakitsoq/Oqaatsut aamma Tinussaraa. Inissinneqarfissaa, aamma umiarsualivittaassami ingerlatassat annertussusissaat il.il., nassuiaasersorluakkanik toqqammaveqarluni aaliangiiffigineqassapput, tamakkualu suliarineqassapput.

Teknikkikkut pilersuineq, kallerup inneranut, imermut, kiassarnermut, imermut igitassamut, eqqagassanullu kiisalu kommunip angallannermi periarfissaqartitsineranut tunngasoq, pingaarutilerujussuuvoq. Ukiuni aggersuni imminut akilersinnaasumik avatangiisimillu mianerinnittumik periaatsit sammineqartussaapput, matumani eqqaanermut periaatsit nutaaliorfiusut, ullumikkut atugaasunut sumiffiit ilaanni toqqaannartumik inuuttaasut peqqissusaannik ulorianartorsiortitsisunut, taartaasussat. Aammattaaq kissaatigineqarpoq ataavartumik nukissiuuteqarneq siuarsarneqassasoq.

Anguniakkat

  • Angallannermi periarfissanik ineriartortitsineq pissaaq, isumatusaartumik ilivitsuussutsimik paasinninnermik tunngaveqartumik, aningaasat annertunerpaamik pissarsissutigiumallugit.
  • Angallanneq pillugu Ataatsimiititaliarsuuarmi inassuteqaatit aallaavigalugit attaveqaatinut nutaanut annertunerusumik aningaasalersuisoqassaaq, matumani Ilulissani Mittarfimmik allilerineq kiisalu umiarsualiveqarnikkut atortulersuutinik pitsanngorssaanerit ilanngullugit.
  • Ilulissani mittarfimmik allilerineq takornariaqarnermi inuussutissarsiuteqarnermut ineriartortitsinissamut pitsaasumik tunngaviliisuussaaq. Periarfissat tapersersorniarlugit maanna Avannaata Kommunianut tamanut atuuttussamik inuussutissarsiornikkut ineriartortitsinissamik pilersaarusiortoqassaaq tamannali Ilulissani mittarfimmik allilerinissamik Naalakkersuisut pilersaarutaanniit aallaaveqassalluni.
  • Illoqarfiit nunaqarfiillu akornanni angallannermi periarfissat inerisarneqarnerisa innuttaasut suliffeqarfiillu angalasinnaanerat, aamma isumannaatsuuneq toqqissisimanerlu siuarsassavai.
  • Imaatigut angallannermi pissutsit pitsangorsaavigineqarnissaat tassaavoq suliniuteqarfissaq pingaarutilik, sumiiffiit toqqarneqarsimasut, nutaamik umiarsualiveqarfinngorsinnaanerannut tunngatillugu, peqqissaarnerusumik, itissutsinik uuttortaasoqarneranik nunallu assinginik titakkanik toqqamaveqarluni, misissorneqartariaqartoq.
  • Angallannermi isumannaallisaaneq angallattunut mianernarnerusunut pitsanngorsarneqassaaq – ilaatigut atuarfiit aqquserngisa aqqusineeqqallu suliniuteqarfiginerisigut.
  • Kommunalbestyrelsip neriuutigaa angallannermi periarfissanut namminersortut aningaasaliisinnaalernissaat ammaanneqassasoq, soorlu umiarsualivinnut mittarfinnullu tunngatillugu. Tamanna pisinnaavoq ilaatigut nammineerluni sanaartornissamut isumaqatigiissusiornikkut.
  • Pilersaarusiornernikkut nunaminertanik immikkoortitsineq qulakkeerneqassaaq, teknikkikkut pilersuinermi periaatsit imminnut akilersinnaasut nutaat ineriartortinneqarneranni atugassanik, assersuutigalugu eqqakkat suliarineqartarnerannut ataavartumillu nukissiuuteqarnermut tunngatillugu.
  • Siunissami eqqakkanik suliarinneriaaseq atoqqiinermut/atueqqinnermut aamma sumiiffinni immikkoortiterinermut sammitinneqassaaq, aammattaq nunaminertanik eqqakkanik immikkoortiteriviliorfissamik atugassiisoqassaaq.
  • Ilisimasat nutaat aamma ilisimatusarnerit aaqqiissutinut attanneqarsinnaasunut tunngaavissaapput. Silaannap allanngogoriartornerata illoqarfimmut sunniutaasa ilagisinnaasaat tassaavoq ajornartorsiutinik aaqqiisinnaasunik ineriartortitsinermi suliniutinik Kommuni sunniutilimmik peqataassaaq. Matumani unammilligassat nutaat soorlu nunap qeriuaannartup eqqugaaratarsinnaanera aamma atttaveqarniarnikkut ajornartorsiutinik pilersitsisoq.