Takorluuinermiit suliaqarnermut
Kommunip politikkia suliniutaalu tamakkerlutik takorluukkap piviusunngortinnissaanut sammissapput, aammalu kommunip pingaartillugit naleqartitaanik sisamaasunik ersersitsissallutik: Ataatsimuussuseq, Ilikkagaqarneq, Amerlassuseq aamma Tikiffikkuminartuuneq. Tamanna aamma kommuneplanimut atuuppoq.
Kommuneplanip imarissavai, anguniakkami ineriartornermut nunaminertallu atorneqarnissaannut, siunniussat. Taamaalilluni suliniuteqarfiit tamakkerlutik siunnerfeqarput, pilersaarusiornerup ingerlanneqalerneratigut aallartinneqartussanik. Kommunalbestyrelsi, siuniussat tamakkua aallaavigalugit pilersaarusiorfimmi 2030-p tungaanut, sulissaaq.
Suleriusissatut pilersaarummi, suliniuteqarfissatut pingaarutillit 10-t toqqarneqarput, Avannaata Kommunia pitsaasumik siunnerfimmullu naapertuuttumik ineriartornissaata qulakkeernissaanut annertuumik pingaaruteqartussat, aammalu pilersaarusiorfiup ingerlanerani pingaarnersiuinernut aaliangernernullu toqqammaviusussat.
Inuussutissarsiutinik ineriartortitsineq
- Ilinniartitaaneq
- Inoqarfiit aamma inigisat pitsaasut
- Kulturi kinaassuserlu
- Toqqissisimaneq inuunerinnerlu
- Peqqissuuneq pinaveersaartitsinerlu
- Angallannikkut periarfissat
- Silap pissusaa, avatangiiseq pinngortitarlu
- Kulturikkut kingornussat aamma attassineq
- IT, tamat oqartussaaqataanerat oqaloqataanerlu
2017-imut Pilersaarusiornermi periusissiami nutaami siornatigut periusissiaasimasumi immikkut isiginiarneqarsimasut attanneqarnissaat aalajangiunneqarpoq taamaattorli uku iluarsineqarnissaat ilanngullugu:
- Kommuni tamakkerlugu takornariqarnerup inerisarnissaanut annertusisamik samminninneq
- Ilulissani mittarfiup tallilerneqarnissaata aamma kommunimi tamarmi attaveqaateqarnerup nukittorsarneqarnissaata ineriartortinneqarnissaa pillugu annertunerusumik samminninneq
- Illoqarfimmi immikkoortortanik nutaanik pilersitsinikkut Ilulissat allilerneqarnissaa aamma ineriartortinneqarnissaa pillugu annertusisamik samminninneq
- Inuussutissarsiutinut nunaminertanik nutaanik kiisalu aalisarnerup nukiitorsarneqarnissaa pillugu Inuussutissarssiornerup annertusisamik sammineqarnera
Suliniuteqarfissat ilarpassui pilersaarutip ingerlanneqalerneranut toqqaannartumik attuumassuteqarput, ilaali ileqqussamittut kommunip suliniuteqarfiisa allat iluiniillutik. Taamaattorli eqqaamassallugu pingaaruteqarpoq, Avannaata Kommunia suliassaataasa suliarinissaat unammilligassaasalu sillimaffiginissaat pillugit, ilivitsuusutut, kommunimilu ingerlatsiviit susassaqarfiilu assigiinngitsut akimorlugit sulisoqartariaqarnera.
Pissutsinik, inatsisiliornernik allanik aqunneqartunik, ingerlatsineq
Avannaata Kommunia qulequttanik assigiinngitsunik, ilaatigut kommuneplanimut ilanngunneqanngitsunik imalluunnit ilaannakortumik ilannguneqartunik suliaqartarpoq, inatsisitigut, siunertamut tunngatillugu aaliangersakkatigut, malittarisassatigut nalunaarusiatigullu aaliangersaaffigineqareersimasunik. Taamannak pisoqartillugu qulequttat tamakkua kommuneplanimut ataqatigiissaarneqartarput, pingaartumik piviusumik annertussusissaannut, nunaminertanullu, tunngatillugit. Qulequttat akuttunngitsunik, illoqarfinni nunaqarfinnilu, illut akorninut tunngasuusarput.
Taamaattumik pilersaarusiorfimmi atuutilersussami naatsorsuutigineqarpoq, ilaatigut makkua suliarineqassasut:
- Nunaminertanut sunngiffimmi atorneqartartunut pilersaarut, taakkununnga ilaallutik, pinnguartarfiit, qorsooqqinnersat aamma nunaminertat sanaartorfigeqqusaanngitsut, allallu. Tamanna ingerlanneqassaaq, kommuneplanip ilassutitigut, ataavartumik naleqqussartarneratigut.
- Qimmeqarnermut malittarisassap suliarineqarneranut atatillugu, nunaminertat qimmilivittut atugassanngortinneqareersimasut, aamma nunaminertat qimmilivioreersut kommuneplanimut ilanngunneqassapput, nunaminertanik, siunertamut naleqquttunik atussallugillu illersorneqarsinnaasunik, atugassiisoqarneratigut.
- Umiatsianik inissiisarnermut maleruaqqusat suliarineqarnerannut atatillugu, nunaminertani pioreersuni, nunaminertanilu nutaani, umiatsianut inissiiffiusinnaasunik toqqaasoqassaaq.
- Angallassissutit motorillit atorneqartarnerat pillugu nalunaarusiap atorneqarneranut tunngatillugu, kommunimi maleruaqqusakkut, angallannermi ingerlaarfissat aamma/imaluunniit asimi angallavissat killilikkat, eqqissisimatitsinermi soqutigisanut nunaminertanullu malussajasunut, ataqatigiissarneqassapput.