click me

Oqallinnermut peqataagit









Illit illersorneqarnissat peqqutigalugu najukkat





Kommuneplania

Saqqaa / Asi / K: Illuaqqat, sunngiffimmi sammisassaqartitsiviit assigisaallu

K: Illuaqqat, sunngiffimmi sammisassaqartitsiviit assigisaallu


Illuaqqanut, sunngiffimmi illuutigineqartunut assigisaannullu immikkoortortat sunngiffimmi illuaraatitut illuaqqatullu aasarsiortarfittut nalilerneqartarput, tassa ukioq kaajallallugu najugaqarfigineqarsinnaanngitsutut. Immikkoortortani killilimmik turistinik unnuiffiusinnaasut, piniartut illuaraat illuaqqallu ajornartorsiulernermi oqquiffiusinnaasut pilersinneqarsinnaapput, amerlassutsimikkulli immikkoortortami illuaraateqarfinnut illunillu aasarsiortarfeqarfiusunut akornutaalertussaassanatik.

Sanaartortoqarsinnaavoq annikitsumik inuussutissarsiornermut tunngassuteqarsinnaasunik, soorlu ikaanik, pujoorivinnik, naatitsivinnik assigisaannillu nammineq atugassatut pisariaqartinneqartunik. Tamakku illuaqqap eqqannguaniitinneqartariaqarput.

Sumiiffiit immikkoortuinut aalajangersakkat pingaarnerit ataani takuneqarsinnaapput.



Immikkoortortami K-imi illuaqqioriaatsit tallimat pilersinneqarsinnaapput: Sunngiffimmi illuaraatit, illut aasarsiortarfiit, turistinut illuaqqiat hotelillu, lejrskolet, piniartut illuaraat illuaqqallu ajornartorsiulernermi oqquiffiusinnaasut:

Sunngiffimmi illuaraatit tassaatinneqarput sivikitsuinnarmik najortagassatut illuaraatigineqartut. Sunngiffimmi illuaraatit piginnittumit ornittagassiaapput annerpaamillu initussutsimikkut 20 kvadrameterimik angissuseqassallutik ammaa 60 kvadrameterimik annerpaamik. Sanaartornermut akuersissummik pigisaqanngikkaluarluni illuaraq taamatut ittoq sananeqarsinnaavoq.

Illu aasarsiortarfik tassaatinneqarpoq sunngiffimmi namminerisamik atugassiaq. Illut aasarsiortarfiit initussutsimikkut 20 kvadratmeterimit annerusunngorlugit sananeqarsinnaapput. Illumik aasarsiortarfimmik sanalertinnani inatsisit malillugit sanaartornermut akuersissut pissarsiarineqarsimasariaqarpoq.

Takornariat illuaraat/hotel-it tassaatinneqarput inuussutissarsiorneq siunertaralugu attartortittagassatut sananeqarsimasut. Attartortitsineq tassaasinnaavoq turistinut nunaq-qatinulluunniit attartortitsineq. Takornarianut illuaqqat annertunerpaamik 200 kvm-ussapput Turistinut illuaqqiat angissusissaannik aalajangersagaqanngilaq. Turistinut illuaqqianik sanalertinnani inatsisit malillugit sanaartornermut akuersissut pissarsiarineqarsimasariaqarpoq.

Illut lejrskolinik taaneqartartut tassaapput, kommunip atuarfiinit, sunngiffimmi klubbinit imaluunniit pisortat sullissiviinit atorneqartartut. Lejrskolit kommunimit imaluunniit suliniaqatigiiffinniit pigineqartarput. Lejrskolit nunaminertani K-niittut qaliaqarsinnaapput annerpaamillu 240 m2-ullutik. Sanaartorneq sanaartornissamut akuersissutitaqartussaavoq sanaartornermi inatsisit atuuttut naapertorlugit.

PIlluaqqat piniariartarfiit aamma ananniarnermi atorneqartartut tassaapput illuaqqat mikisut, nalinginnaasumik aallaaniarnermi, piniariarnermi, aalisarnermi, savalerinermi aamma sunngiffimmi ingerlatanut, piffissami sivikitsumi kikkunnit taamanit atorneqarsinnaasut. Illuaqqat taamaattut kommunimiit imaluunnit suliniaqatigiiffinniit pilersinneqarsimakkajuttarput. Illuaqqat piniariartarfiit annanniarfiusinnaasullu qanoq angitigisinnaaneri malittarisassartaqanngillat, aallaaviusarporli mikisuunissaat. Sanaartorneri sanaartornermi inatsisitigut akuersissummik piumasaqaatitaqanngillat.

K-mi immikkoortortat imatut agguataagaapput:

Illuaqqanut assigiinngitsunut makku atuupput:

  Atuisut Angissuseq Portussuseq Illuliaq Nunaminertaq
Sunngiffimmi illuaraq Nammineq pigisaq max 20 m2 Quleriit 2 max 7,5 m Akuerisaanngilaq** + Akuerisaavoq
Aasarsiortarfik Nammineq pigisaq max 60 m2 Quleriit 2 max 7,5 m Akuerisaavoq*** + Akuerisaavoq
Takornariat illuaraat Atukkiunne-qarsinnaasoq max 200 m2 Quleriit 2 max 7,5 m Akuerisaavoq**** + Akuerisaavoq
Lejrskole Atukkiunne-qarsinnaasoq max 240 m2 Quleriit 2 max 7,5 m Akuerisaavoq + Akuerisaavoq
Ajornartorsilernermi-/ Piniariartarfik Tamanut ammavoq Piumasaqaa-titaqanngilaq Quleriit 1
max 5,5 m
Akuerisaanngilaq***** + Akuerisaavoq

 * Illuaraqarfinni inissianik marlunnik quleriilinnik sanaartornissamut periarfissiisoqarsinnaavoq, ini kiisalu qaliaq atorneqartoq sananeqarniarpat.

** Sunngiffimmi illuaraq" nalinginnaasumik sanaartornermut suliatut ingerlanneqassanngilaq, Illuliortiternermut oqartussaasup pisuni ataasiakkaani pisussatut nalilersimanngippagu.

*** Aasarsiortarfik" " nalinginnaasumik sanaartornermut suliatut ingerlanneqassanngilaq, Illuliortiternermut oqartussaasup pisuni ataasiakkaani pisussatut nalilersimanngippagu.

**** Takornariat illuaraat" nalinginnaasumik sanaartornermut suliatut ingerlanneqassaaq,  Illuliortiternermulli oqartussaasup pisuni ataasiakkaani pisariaqanngitsut nalilersimappagu suliarineqarnissaa pisariaqassanngilaq.

***** Piniariartarfik aamma "Ajornartorsiulernermi illuaqqat" nalinginnaasumik sanaartornermut suliatut ingerlaneqassanngilaq, Illuliortiternermut oqartussaasup pisuni ataasiakkaani pisussatut nalilersimanngippagu.

 

Eqqagassat angerlaanneqassapput ikuallanneqassallutilluunniit.Ikuallaanerup sanaartukkanut allanut pinngortitamullu navianartorsiortitsiviunnginnissaa allanullu akorngutaannginnissaa nakkutigineqassaaq.

Anartarfittut qattat anartarfissiat atorneqarsinnaapput, imaannik imaanut eqqaanermi allanut akorngusiinnginnissaq pinngortitamillu mingutsitsinnginnissaq sianigineqassaaq. Illuni pioreersuni kuutsittakkanik anartarfilinni kuutsitap mingutsit-sinnginnissaa aamma isumagineqassaaq.

K1: Illuaqqat illullu aasarsiortarfiit eqqaat

Illuaqqat illullu aasarsiortarfiit eqqaasa ilisarnaatigigajuppaat najugaqarfissatut illuliortiterfissat avataanniittaramik. Taamaasilluni sanaartornissaq tamarmi illuaqqanut qaninnernut attuumassuteqartarluni.

Illuaqqiorneq pisinnaavoq illuaqqamut pioreersumut minnerpaamik 60 meterimik ungasissusilerlugu. Kommunalbestyrelse pisariaqartitsivinneq naapertorlugu ungasissusissatut minnerpaaffissanik allanik akuersissuteqarsinnaavoq. Sumiiffiup ilusaa najoqqutaralugu kissaatigineqarpat illuaqqat minnerpaamik 100 -200 meterinik ungasissuseqarnissaat akuersissutigineqarsinnaavoq.Illuaqqat sunngiffimmi sammisassaqartitsiviit illullu aasarsiortarfiit quleriit marluk angullugit sananeqarsinnaapput, tassa qaliaasaatigut ineerartaqartinneqarsinnaallutik. Toqqavii annerpaamik pukkinnerpaaffimmikkut 1 meterimik portussuseqarsinnaapput. Illuliaq asiunaveersartuarneqassaaq sumiiffimmini takussunarsaataaleqqunagu.

Illuaraqarfiit illullu aasarsiortarfiit tungaannut aqquserniornissaq, bilerfiusin-naasunik aqqusiornissaq, aqqusineeraliornissaq, talittarfiliornissaq ataatsimoorussamilluunniit teknikkikkut pilersuiviliornissaq inerteqqutaavoq. Teknikkikkut atortugissaarusersornerit taamaallat illuaqqanut ataasiakkanut atatinneqartut pilersinneqarsinnaapput. Tassaasinnaallutik innaallagissiuutit generatorit seqerngup qinngorneri atorlugit innaallagissiuutit assigisaallu innaallagissamik pilersuutaasinnaasut. Innaallagissamik pilersitsissutaasinnaasut suulluunniit aatsat pilersinneqarsinnaapput qanittumi illuaraatilinnut nipiliornermikkut, pujuliornermikkut, tipiliornermikkut sajuppilutsitsinermikkulluunniit akorngusersuutaanngippata.

K2: Nunaqarfiit inuerussimasut

Nunaqarfiit inuerussimasut nalinginnaasumik K-p ataaniitinneqartarput. Illuaqqat minnerpaamik 30 meterimik akuttussuseqartinneqassapput. Sunngiffimmi illuaraatigineqartut illullu aasarsiortarfiit quleriit marluk angullugit sananeqarsinnaapput, tassa qaliaasaatigut ineerataqartinneqarsinnaallutik. Lejrskolit quleriit 2-usinnaapput. Toqqavii annerpaamik pukkinnerpaaffimmikkut 1 meterimik portussuseqarsinnaapput. Illuliaq asiunaveersartuarneqassaaq sumiiffimmini takussunarsaataaleqqunagu.

Nunaqafinni inuerussimasuni aqquserngit, bilinut aqquserniukkat, aqqusineeqqat talittarfiillu pioreersut pitsanngorsarneqarsinnaapput. Teknikkikkut pilersuinermut atortut mikisut illunut ataasiakkaaginnarnut atortussatut pilersinneqarsinnaapput. Tassaasinnaallutik innaallagissiuutit generatorit seqernulluunniit qinngorneri atorlugit innaallagissiuutitt assigisaallu innaallagissamik pilersuutaasinnaasut. Innaallaagissamik pilersitsissutaasinnaasut suulluunniit aatsaat pilersinneqarsinnaapput qanittumi illuaraatilinnut nipiliornermikkut, pujuliornermikkut, tipiliornermikkut sajuppilutsitsinermikkulluunnit akorngusersuutaanngippata.

Sinerissamut pinngortitamullu allamut ungasissuseqarnissamik piumasaqaat

Pinngortitamik illersuineq pillugu Inatsisartut inatsisaat nr. 29, 18. december 2003-meersoq naapertorlugu Tatsit tarajuusumik imeqartut aamma tatsit tarajornitsuusut, kuuit, puilasut kissartut sinerissallu killeqarfiisa avataanni pinngortitami immikkut ittunit ataani taaneqartunit 100 meterinik qaninnerusumi illunik inissiisoqassanngilaq, naasunik orpinnilluunniit ikkussuisoqassanngilaq, naatitsisoqassanngilaq kussiortoqaranilu imaluunniit allatigut nunap pissusia allanngortinneqassanani.

Sunngiffimmi takornarianullu illuaqqat pinngortitami immikkut ittuni taaneqartuni sinerissamiillu 100 meterinik qaninnerusumi inissinneqarsinnaapput, tamanna kommunimut pilersaarusiap immikkoortortap atuuttup aalajangersagartaani immikkuualuttuni aalajangersarneqarsimappat.

Pissutsini immikkut ittuni Naalakkersuisut ungasissutsimik piumasaqaatitut aalajangersakkat qulaani taaneqartut naapertorlugit immikkut ittumik akuersissummik tunniussisinnaapput.



Kingullermik iluarsineqarpoq 21-12-2018

Attaveqarfissaq

Avannaata Kommunia
Noah Mølgaardip Aqq. 9
Postboks 1023
3952 Ilulissat

Telefon: (+299) 70 18 00
plania@avannaata.gl

GER-nr: 37488909